EB Invest ju prezanton përmbledhjen më të re rreth Udhëzimit të Këshillit të Ministrave, nr.1, datë 17/07/2024, “Për miratimin e modelit dhe përcaktimin e rregullave të mbajtjes së regjistrit të lejes së ndërtimit, si dhe të proçedurave të regjistrimit të kontratës së sipërmarrjes/ porosisë dhe të premtimprishjes”, i cili përcakton rregullat e reja për mbajtjen e regjistrit të lejeve të ndërtimit dhe për regjistrimin e kontratave ndërmjet zhvilluesit të pronës, pronarit të truallit dhe blerësit/porositësit.

1.Mbajtja e regjistrit të lejes së ndërtimit

Aksesi dhe përpunimi i të dhënave: Të gjitha veprimet do të realizohen nëpërmjet regjistrit deri në momentin e regjistrimit të karabinasë dhe transferimit të akteve noteriale. Aksesi për përpunimin e të dhënave do të bëhet në përputhje me ligjin nr.111/2018 “Për kadastrën” dhe Ligjit nr.9887/2008, “Për mbrojtjen e të dhënave personale”.

Dërgimi i dokumentacionit: Kryetari i Bashkisë ose Këshilli Kombëtar i Territorit janë përgjegjës për dërgimin elektronik ose me postë të lejes së ndërtimit dhe dokumentacionit për regjistrim pranë ASHK-së, ku kjo e fundit duhet të regjistrojë lejen e ndërtimit brenda 15 ditëve nga data e marrjes së dokumenteve.

Format digjital: Regjistri do të administrohet në format digjital dhe do të plotësohet sipas kërkesave pranë ASHK-së e cila është përgjegjëse për lëshimin e vërtetimit të regjistrit të lejes së ndërtimit.

2.Procedurat e Regjistrimit të Kontratave së Sipërmarrjes

Akte noteriale: Regjistri i lejes së ndërtimit do të përfshijë edhe aktet noteriale që përmbajnë marrëveshjet ndërmjet zhvilluesit të pronës, pronarit të truallit dhe blerësit.

Kushtet e regjistrimit:

ASHK-ja do të regjistrojë lejen e ndërtimit vetëm kur plotësohen këto kushte:

• Aktet noteriale janë në përputhje me legjislacionin noterial.
• Aktet përmbajnë të dhëna të plota dhe të sakta kadastrale.
• Verifikohen aktet e mëparshme të regjistruara në regjistrin kadastral dhe të ndërtimit.
• Verifikohen marrëveshjet e mëparshme të regjistruara në regjistrin e lejes së ndërtimit.

Afati për plotësim: Nëse kushtet e mësipërme nuk plotësohen, aplikuesi informohet për plotësimin e tyre brenda 30 ditëve. Nëse ky afat nuk respektohet, kërkesa refuzohet.

Publikimi i regjistrimit

ASHK-ja publikon:

• Kontratën mes zhvilluesit-investitorit dhe pronarit të tokës në seksionin D të kartelës së pasurisë së paluajtshme. Pas shkëmbimit, regjistrohet në regjistrin kadastral sipas ligjit nr. 111/2018.
• Kontratën mes zhvilluesit-investitorit dhe blerësve/porositësve në të njëjtin seksion. Pas shitjes, regjistrohet në regjistrin kadastral sipas ligjit nr. 111/2018.

Në Vëmendjen tuaj:

• Aktet noteriale të regjistruara para këtij udhëzimi do të verifikohen nga ASHK-ja. Nëse të dhënat nuk janë të plota, regjistrimi refuzohet.
• Lejet e ndërtimit të regjistruara manualisht para këtij udhëzimi do të përfshihen në regjistrin digjital.
• Aktet noteriale ndërmjet zhvilluesit dhe blerësve regjistrohen pas regjistrimit të lejes së ndërtimit.
• Udhëzimi nr. 1, datë 13.4.2016, shfuqizohet.
• Agjencia Shtetërore e Kadastrës është përgjegjëse për zbatimin e këtij udhëzimi.

?

Ky udhëzim hyn në fuqi pas publikimit në Fletoren Zyrtare